Alamat ng Asukal na Pula

Noong unang panahon

sa Hacienda Luisita

sa plantasyon ng asukal

ng mga Cojuanco

may manggagawang bukid

na ang ‘ngalan ay Sakada

nagtatanim at nag-aani

ng tubó.

Si Sakada’y may asawa’t

labing-isang anak

tubo ng Bicol

napadpad sa Tarlac

payat, maitim na

sunog ang balat

sagana sa hirap

sa sarap ay salat

Ang tubó sa hasyenda

ay napakatamis

sapagkat dinidilig

ang lupa ng pawis

samantalang ang asukal

ay napakaputi

sapagkat may pag-asa

ng ginhawang mithi

Subalit si Sakadang

istakholder ng azucarera

at apatnapung taon nang

nagsasaka sa hasyenda

ay nanyn pipti lamang

isang araw ang kinikita

at hanggang ngayon

wala pang lupang kanya

Si Sakada sa trabaho’y

Biglang nasibak

Namatay sa gutom

asawa’t dal’wang anak

‘Pinasa-diyos kapalarang

sila’y nasadlak

Sumunod na namatay ang

tatlo pang anak

Nagtipon ang mga

manggagawang bukid at sacadas

itinigil ang paggawa

sa berdugong hasyenda

nagkaisang ipaglaban

ang karapatan nila

at nagsagawa

ng malaking welga

Tinangkang buwagin

ang mga welgista

ng daang-daang pulis

todo pamalo at panangga

binomba ng tubig na

may mga piraso ng bakal

tinirgas at ‘tinaboy

sa pinakamadahas na asal

Habang sumusulong

isinisigaw ang karapatan

sanlaksang bala sa kanila’y

pinakawalan

Si Sakada’t mga kasamang

magiting na nakipaglaban

dinilig ng dugo

ang malawak na tubuhan.